Urang Lembur Kudu Bisa Ngolah Tatanen

Advertisment

( Ku : Abah Andy Gumilang )

Asa ngimpi puguh ge zaman geus robah kiwari kalembur-lembur mobil motor teu sirikna diunggal sesela. Waktu Abah keur budak taun tujuh puluhan buru-buru ngulampreng motor kareta mesin (sapedah) ge weuh nu boga.Kawantu jalan nu taringgul alias jalan setapak. Inget harita teh saking hayang-hayangna boga motor barudak ngadon nyarieun rorodaan tina kayu gilindingna tangkal kalapa. Resep weh nu aya, waktu senggang sok ngadon rorodaan di pudunan jalan nu lega. Mun nanjak dipanggul gegenten, ari mudun mah tarumpak mani ngagulusur Kawantu teu make rem.

Alat komunikasi ukur radio transistor harita mah boro-boro hape, telpon ge teu aya bubuhan can aya listrik kalembur teh. Urang lembur waktu harita estu misobat jeung alam. Barudak harita sok daraek ngala suluh, ngala jukut jang embe, ngangon munding, macul, ngored kebon, babut binih, tandur, ngarambet ( ngoyos ), dibuat ( ngala pare ) ngabantuan kolot. Najan kitu ulin oge kaboro kasorenakeun. Komo Mun seug halodo peuting caang bulan ngadon ngabungbang.

Kiwari zaman geus robah Sarwa modern urang lembur nu kabandungan ku Abah arang langka nu daek ngolah tatanen, contona Suan jeung incu Abah boh nu awewe boh nu lalaki dilembur buru-buru daek ngolah ngokolakeun tatanen. Barudak teh sapopoena ukur ngaromean hape. Kolot mah disawah jeung dikebon keur ngolah tatanen barudak mah arulin di Imah ngarome permainan ( game) dina hape. Abah ukur ngusap dada bari amanat, kade kanu tetep renggenek di lembur kudu bisa ngolah tatanen. Omat ulah mohokeun tatanen sumber kahirupan urang sarerea. cag ah !!