Advertisment
(Ku Abah Andy Gumilang)
Usum ngijih mangrupa anugrah jeung rejeki pikeun kahirupan sapopoe. Gusti nu Maha Suci maparin hujan bisa dimangfaatkeun pikeun pelelakan. Patani di pilemburan nu sawah jeung kebonna kasanglat ku cai, dina usum ngijih mah ceuyah teu kakurangan.
Tapi balukar tina ceuyahna cai nu terus terusan dina usum ngijih hate Abah sok timbul kahariwang. Teu kitu kumaha kapan Abah sapopoe hirup teh aya di tutugan gunung, cek para ahli mah wewengkon lembur Abah teh "rawan bencana".
Kahariwang kaalaman kunu hirup di karota, balukar ceuyahna cai musibah banjir dimana mana. Kaalaman ku suan alo kaponakan nu ngalumbara di kota, pareng usum ngijih imahna mindeng katatamuan ku caah atawa banjir. Tuda geura wae eta cai nu aya di walungan mani ngagurudag warnaan pacampur jeung kukumur taneuh rugrugan.
Ku mindengna kajadian bancang pakewuh sarupaning urug (longsor) di pilemburan, tur caah (banjir) di pakotaan, urang sarerea sing waspada tur iatna. Kajadian penomena alam cuaca extrim nu nimbulkeun hujan wae, ngingetkeun ka urang sakabeh, utamana anak incu, suan alo kaponakan, dulur-dulur nu di lembur baraya nu di kota peupeujeuh sing caringcing pageuh kancing saringset pageuh iket, tarapti nastiti ati-ati tur maranti.
Dulu-dulur urang lembur ulah nuaran kakayon nu keur sumedeng hejo ngemploh, anggursi piara atawa cegah kai-kai nu nyampak di eta leuweung bisi ditaluaran atawa dimusnahkeun. Miceun runtah ulah dapon lung wae ka lebak (walungan), kana jarian sarta miceun runtah dipakarangan Imah.
Urang sarerea kudu mibanda kasadaran miceun runtah kana tempatna. Rupa-rupa wangun larangan contohna "Buanglah sampah pada tempatnya", terus aya oge nu nulis kalimahna kieu "Jangan membuang sampah sembarangan" jeung rea-rea deui wujud larangan miceun runtah.
Mudah-mudahan padumuk nu di lembur, warga nu di kota ulah keulat musibah boh keulat longsor/urug atawa keuna ku banjir, jauhkeun tina sagala musibah jeung bancang pakewuh, Amin...***
(Tdgn, 25223 )
