Advertisment
Ku : Andi Gumilang
Bulan puasa atawa bulan Romadhon bulan pinuh barokah, bulan pinuh Rohmat. Umat Islam ngalaksanakeun ibadah saum (puasa) lilana sabulan campleng, diteruskeun sabada Isa sholat taraweh katut tadarusan. Satacanna buka puasa wanci panonpoe tunggang gunung barudak sok liar ulin ngabuburit. Perenahna di alun-alun atawa tempat-tempat anu lalegasaperti di jalan parapatan jeung tempat-tempat sejenna.
Ngabuburit zaman bihari waktu Abah keur budak, mibanda kesan jeung kenangan nu teu weleh waas. Harita mah ngabuburit teh perenahna di alun- alun aya oge nu diparapatan. Barudak rame ngadon eleng- elengan,odot-odotan, sasamunian, surgandul, pareket jengkol, huhuian, jeung sajabana. Barudak eureun sanggeus ngadenge tangara buka puasa ti masjid.
Kiwari ngabuburit teh geus beda, barudak inditna ti imah bari mamawa hape. Barudak ngumpul di pipir bale ngadon dariuk ngarome hape sewang-sewangan, maraen games. Kaalaman ku incu abah rek indit nu dibabawa teh hape.
Di Alun- alun desa Atawa diparapatan geus langka nu ngadon eleng-elengan, odot-odotan atawa kaulinan barudak sejenna. Pangaruh tehnologi ngarobah paradigma anyar. Abah jarang manggihan barudak nu keur ngabuburit ngadon eleng-elengan jeung odot-odotan, Komo pareket jengkol mah teu manggihan.
Teu di kampung teu di kota, barudak nu ngabuburit teh marawa hape. Barudak manco kana hape keur maraen game, pantar Abah mah teu ngarti pisakalieun, abong kena hirup geus cueut ka hareup teu hayang ngarti ongkohan..!! Abah pesen ka incu, suan alo kaponakan ulah kamalinaan teuing ngome hape, atur waktu ku cara nyieun jadwal poean, lain nyaram ngome hape tapi ngome hape kudu inget waktu, waktu ngapalkeun der ngapalkeun, waktu diajar ngaos der ngaos, waktuna taraweh der taraweh, waktuna sholat der sholat. Cag Ah...
