Advertisment
Ku : Abah Andy Gumilang
Teu karasa mungguh hirup di alam pawenangan ieu, puguh sataun teh karasana ku Abah mah asa sajorelat pisan, ti poe ka poe ti minggu ka minggu, ti bulan ka bulan, ti taun ka taun nyerelek.
Saking betah-betahna dialam dunya teu karasa bulan Rewah ( Sya'ban ) lekasan di tema ku bulan suci Puasa Atawa Romadhon. Patali jeung eta dilembur Abah aya hiji kabiasaan malah beunang disebutkeun geus jadi tradisi saban mapag bulan puasa pisapoeeun rame kunu nabeuh bedug atawa ngadulag. Marebot (pangurus Masjid) meunang informasi ti pamarentah yen isukan mimiti puasa. Der weh Marebot nabeuh bedug ( ngadulag) di masjid. Teu tinggaleun barudak rumaja masjid ge kumpul di masjid ngagentenan Marebot nabeuh bedug mapag datangna bulan suci tea.
Tengah poe sabada lohor kadenge sora dulag nereteg. "Sujaaang ... geus aya sora dulag di Masigit, engke mimiti taraweh isukna mimiti puasa. Mireungeuh omongan kitu tinu jadi kolot aya rasa bungah nu nyangkaruk dina kalbu, kateuing naon sababna da nu eces mah timbul rasa sumanget, tur bungah isukan mimiti puasa.
Kiwari zaman geus canggih sora dulag di masjid-masjid utamana di pilemburan mah geus mangrupa kabiasaan nu maneuh bisa oge disebut tradisi. Sora bedug ( dulag ) mangrupa tangara mapag datangna bulan puasa. Nilik tina kabiasaan nabeuh bedug, atawa ngadulag tea nu nepi ka kiwari masih keneh dilaksanakan, mibanda ajen inajen anu kawilang hade, ku tangara eta warga lembur salawasna tumut kana aturan boh agama atawa darigama. Lian ti eta warga lembur boga pancen silih bejaan yen isukan teh resmi mimiti puasa. Sora dulag nu neregteg di masjid mere motivasi ka warga lembur pikeun salawasna sumanget jeung kudu leket ibadah ngalaksanakeun kawajiban salaku umat Islam.... Sora dulag tangara mapag puasa, bagea bulan Puasa, bulan nu pinuh ku barokah, wilujeng ngalaksanakeun puasa ( saum ) singkahan nu bisa ngabatalkeu puasa. Mugi-mugi Allah SWT nangtayungan ka urang sadaya....Aamiin ....
( Lembur singkur memeh saum 1932023 )
