Advertisment
Ku : Abah Andy Gumilang
Sabab-saban bulan suci Puasa, geus jadi kabiasan malah bisa disebut tradisi numatak haneuteun nyaeta ngahudangkeun Saur. Barudak rumaja boh nu aya di pilemburan sumawona di kota najan Kiwari najan geus sarwa canggih oge kagiatan positif kaum barudak rumaja (pamuda) teh maneuh dilaksanakeun.
Kateuing iraha mimitina ngahudangkeun saur teh, nu eces mah geus aya ti beh dituna (baheula pisan). Sainget Abah taun tujuh puluhan nu ngahudangkeun saur teh ngagunakeun kohkol tina awi, ditabeuhna ngawirahma. Atuh puguh wae dina wanci janari leutik ngadenge wirahma kohkol teh nu keur talibra ngorejat hudang, gesat gesut nyangu jeung barang asakan sakumaha mistina jang dahar saur tea. Nabeuh kohkol mapay-mapay jalan gang nguriling di tempat padumukan. Ka behdieunakeun nu ngahudangkeun saur teh umumna para rumaja. Alatna lian ti kohkol aya oge genjring, tamtam, malah barudak rumaja anu kreatif mah nyieun alat tatabeuhan tina barang bekas, contona botol galon kapan bisa jang gendang sorana badis kendang, tambah deui kecrek jeung sajabana mani rame diwuwuh ku lalaguan dangdut jaman ayeuna, malah Kiwari loba oge nu make sombok, rame kacida.
Nilik tina kagiatan saperti kitu tetela perlu perhatian ti urang sadaya, lantaran urang salaku kaum muslimin kacida kabantuna ku ramena nu ngahudangkeun, barudak rumaja sabulan menteyeng ngahudangkeun saur, pungkasna bulan puasa barudak teh nguriling bari tararabeuhan eta mah waktuna sore. Warga padumuk surti ka barudak nu taratabeuhan teh sung-song marere duit receh saikhlasna, aya oge nu mere beas. Barudak ngarasa bungah dumeh meunang rejeki, atuh warga padumuk ngarasa kabantu kuayana kagiatan ngahudangkeun saur. Abah pesen ieu kagiatan anu kawilang alus teh, sataun sakali tetep langgeng, atuh urang salaku warga ulah owel nandonkeun sabagian rejeki pikeun barudak nu kreatif ngahudangkeun saur tea. Mudah-mudahan parek rejekina jauh balaina, sehat sadayana, barudak rumaja tetep sumanget ngahudangkeun saur!Wilujeng ngalaksanakeun saum. Cag ah.....!
