Advertisment
Ku : Abah Andy Gumilang, S.Pd
Sok waraas puguh oge mun inget taun tujuh puluhan. Harita beunang disebutkeun zaman hara-haraeun. Teu kitu kumaha geura, caangna peuting ngagunakeun damar, cempor,lantera, lampu ajug make minyak lantung. Imah padumuk pangeusi lembur rata-rata panggung make bilik tina awi aya golodog.
Pisaminggueun keneh geus haneuteun mersiapkeun sapuratina jang lebaran atawa bada. Padumuk sibuk nutu pare ketan, nutu beas jang tipung. Sora lisung teu sirikna patembalan aya geter tineung rasa bungah nu nyanyangkaruk dina kalbu, bungah amar wata suta ceuk ki dalang tea mah.
Teu Kitu kumaha apanan geus jadi kacapangan sagala-gala oge jang bada ( lebaran ), padahal mah lebaran teh ukur sapoe.
Pisapoeeun lebaran, sanggeus pamarentah ngabewarakeun mungkas puasa jeung mastikeun poe lebaran. Pangurus masjid dibaturan sajumlah rumaja masjid nabeuh bedug alias ngadulag mani rame dilaksanakeun rengse sholat lohor.
Alhamdulillah... tah sujaang... Nyai... sora dulag di Masigit geus neregteg ... tulus bada teh ...! Sora dulag mapag Lebaran dipilemburan geus jadi tradisi ti bihari nepi ka kiwari, ti zaman hara-haraeun nepi ka zaman moderen masih aya keneh dikieuna.
Cag Ah.....Mugi-mugi urang sadaya tiasa ngaronjatkeun kaimanan sareng katakwaan ka Gusti Nu Mahasuci, Aamiin.....
Hampura bisi Abah loba kasalahan ti luhur sausap rambut tihandap sahibas dampal * * (Tapensayong 2023)
