Advertisment
Ku : Abah Andy Gumilang, S.Pd
Di Pilemburan hususna, aya kabiasaan atawa beunang disebutkeun tradisi nu turun tumurun ti baheulana. Salah sahiji nu aya di lembur Abah ( di Kuningan beulah kidul ) nyaeta Tradisi Nyecep, alias mere duit ka budak nu rengse di disebrel atawa di sunatan.
Bengkong ( paraji sunat ) taun tujuh puluhan zaman Abah keur budak nyunatan teh make alatna basajan pisan babango jeung pesona mirip peso cukur seukeut naker. Pikeun ngubaran lukana make ubar tradisional antarana bae gambir,daun seureuh, katut endog bobodasna. Sanajan sarwa walurat tara kabejakeun barudak nu disunatan teh teu wararas, kabeh ge waras tur sehat deui, ngan memang rada aya samingguna nepi ka sapuluh poean datang ka nyeda teh.
Kadieunakeun kaalaman ku incu-incu Abah disunatan make tehnologi canggih, make aya nu ngagunakeun alat tehnologi lasser sagala atuh pikeun ngubarana lukana make ubar ti apotek dumasar resep dokter. Baheula mah aya samingguna budak karek waras disunatan teh, ayeuna mah ukur dua tilu poe budak geus waras bisa leumpang deui.
Kateuing iraha mimitina, ti zaman Abah keur budak ge kabiasaan atawa tradisi nyecep teh geus aya. Waktu Abah budak, harita ma'lum hirup sarwa walurat meunang duit panyecep teh bungahna luar biasa. Duit panyecep nu diwadahan baskom zaman harita mah sok dibeulikeun kana ingon-ingon, contona meuli anak domba jeung hayam bangkok jago. Bungah pisan meunang duit panyecep teh, lantaran lian kabual meuli ingon-ingon leuleutikanan, oge bisa meuli pangabutuh sakola kayaning alat tulis, baju seragam jeung sapatu.
Kabehdieunakeun kaalaman ku anak Abah duit pangbubungah sunatan teh sok dipake meuli sapedah, jeung pangabutuh budak sunat sejenna.
Zaman Kiwari duit hasil panyecep teh dipake meuli hape android, ma'lum zaman kiwari zaman sarwa canggih, hape teh dinomer hijikeun.
Usum nyecep teh biasana ninggang dina bulan Sawalmulud, Sawalpuasa jeung Rayagung. Encan nu hajat nikahkeun rambeuh. Nu nyunatan aya dua cara, cara hajatan nu ondang-ondang jeung cara kedesek ( kedekes/rerencepan )alias nu teu apal atawa teu ibur tianggalna. Nyaho-nyaho teh si anu budakna bapa anu disunatan cenage. Atuh puguh we nandonkeun duit panyecep teh teu mahi sapeser dua peser, diitung-itung dijumlah-jamleh duit nu dipake nyecep ka budak sunat teh lumayan gede. Encan nu dipake nyambungan kanu hajat rongkah boh hajat nyunatan sok sumawona hajat nikahkeun. Hirup kumbuh dipilemburan mah beda jeung di kota hirup napsi-napsi teh lain bobohongan, sedengkeun di pilemburan mah kudu guyub, mun teu nyecep jeung teu datang nyambungan teh era parada.
( Tapensayong 3132023 )
