Advertisment
Ku : Abah Andy Gumilang, S.Pd
Gotong royong mangrupa ciri masyarakat nagara urang nu maneuh ti jaman nini moyang baheula. Utamana hirup kumbuh di pilemburan estu merlukeun pisan gotong royong. Diawalan ku musyawarah mufakat, warga masyarakat aub guyub ngalaksanakeun kagiatan gotong royong sacara sukarela. Ieu kagiatan teh geus bisa disebutkeun hiji tradisi anu hade dina kahirupan sapopoe warga bangsa nagara urang.
Contona di lembur abah aya nu katelah jiwa pihartieunana gotong royong-gotong royong keneh. Jiwa nyaangan jalan, jiwa rehab mushola, jiwa rehab pos ronda, jiwa nyieun saluran cai (wahangan) jeung sajabana anu aya patula patalina jeung kaperluan umum mindeng dijiwakeun atawa digarap sacara gotong royong. Boh udunan waragadna sok sumawona tanagana mufakat ditanggung ku warga masyarakat setempat.
Kagiatan gotong-royong nepi ka kiwari di pilemburan mah masih keneh aya, teu kalindih ku wanci teu laas ku jaman. Ngan anu perlu diperhatikeun teh antara kuantitas jeung kualitasna. Ditilik tina kuantitas gotong royong kawilang hade, kualitasna oge nya kitu keneh kudu hade. Jadi ulah nepikeun kuantitasna hade tapi kualitasna kurang hade. Maksud teh dina disiplin gawena perlu dironjatkeun, nya kitu keneh hasilna oge kudu hade, ulah boga rasa laaah ......da gotong royong ieu.... eces pisan antara kuantitas jeung kualitasna kudu saimbang. Hal ieu sangkan hasil gotong royong kudu leuwih hade tibatan gawe borongan atawa kuliari, ulah sabalikna. Sanajan kiwari sagala-gala make duit......gotong royong mah ulah nepi ka leungit tanpa lebih ilang tanpa Karana. Urang mumule tradisi nu hade ieu kucara ngaronjatkeun kualitas gotong royong kasebut. Cag ah !
( Tapensayong 2023 )
