Advertisment
Ku : Abah Andy Gumilang, S.Pd
Sok inget jaman waktu Abah masih keneh budak kira taun tujuh puluhan, waktu masih keneh sakola di SD jeung balad-balad Abah mindeng ngadon ulin di walungan anu caina herang ngagenclang, diwuwuh ku leuwi anu jero resep dipake mandi bari kokojayan. Ari nu disebut walungan dilembur Abah mah nelahna lebak, kateuing naon sababna di sebut lebak, sigana pedah wae aya dihandap atawa di landeuh posisi panghandapna disebut lebak sotenan. Lebak (walungan) jaman baheula (bihari) lian ti caina herang teh tara aya runtah-runtah plastik, walungan teh estu alami, runtah ge ukur dangdaunan nu murag atawa kabawa caah. Leuwi-leuwi jarero diparake ngojay ku barudak, teu tinggaleun jalma kolot hususna lalaki sok rarajeunan ngadon mandi bari nyiblung memeh subuh patembalan. Kolot baheula ku lobanana leuwi di lebak (walungan) ngarah teu bingung leuwina make dingaranan sagala. Contona di lembur Abah aya nu katelah leuwi kuda, leuwih calung, leuwi saheng, leuwi goong, leuwi meong, duka di lembur batur mah naha dingaranan atawa henteu.? Sigana moal beda jeung di lembur Abah eta leuwi teh make ngaran.
Di walungan jaman Abah keur budak alias jaman bihari, isuk-isuk rame kunu nyariblung, beurang loba nu ngaruseup, nu ngecrik atawa ngalintar di walungan, pasosore rame ku barudak nu ngadon mandi ngorojay saruka bungah, lantaran loba leuwi nu jero jeung lega. Aya oge nu ngadon marak di walungan teh. Rupa-rupa ngaran lauk diantarana beunteur, lalawak, kekel, tumras, julung-julung, jeler, mujaer, beureum panon, berenyit, lele, bogo, nilem, tawes sarta lauk lubang. Abah sabalad- balad harita boga karesep teh kana marak, carana eta leuwi nu loba laukan teh ditawu disaatan, sanggeus saat mah der weh newakan lauk dina leuwi tea. Asa ngeunah dahar jeung lauk ti walungan mah dahar teh ponyo.
Kiwari nu disebut walungan teh kumaha ? Teu sirikna walungan teh jadi tempat pamiceunan runtah. Eta nu matak sareukseuk mah runtah-runtah plastik, cai kalomberan ngumpul di walungan jeung sabudereuna. Leuwi-leuwi geus ruksak kasaeur ku runtah pabaur keusik, cai walungan jadi kotor, barudak ge arang langka arulin di walungan. Abah rarajeunan nalangan cai ti walungan kana balong, dina sakalina hujan gede jeung caah lebah kokocoran kasaeuran ku runtah plastik malah nu matak ijid ( geuleuh, jiji ) mah eta ku Fempers ( dumpel kokotor jalma ) ngumpul di walungan.
Abah mindeng mikiran iraha walungan kiwari siga walungan jaman bihari? Nu kiwari geus terkontaminasi ku macem-macem runtah nu hese buruk di walungan kasebut. Abah umajak yu urang miceun runtah kana tempatna ulah padu lung wae dibabetkeun ka walungan. Eces pisan hal ieu teh merlukeun kasadaran ti urang- urang keneh, cing timimiti ti kiwari cai kalomberan, cai limbah ulah di buang kana walungan sarta miceun runtah oge ulah padu teuing di piceun ka walungan, runtah diduruk atawa dikubur solusina, urang kembalikeun deui lebak atawa walungan kasebut saperti walungan jaman bihari (baheula) caina herang, dina leuwi aya laukan, dina leuwi bisa mandi, ngojay jeung nyiblung. Cag Ah ...!!! (Tapensayong 2024)
