Advertisment
Ku : Abah Andy Gumilang, S.Pd
Basa daerah kaasup basa Sunda nepi ka kiwari masih aya keneh. Basa daerah bakal leungit mun geus leungit pamakena, kitu kira-kira pibasaeunana. Hal ieu teh ngandung harti saupamana pamakena geus leungit tangtu basa daerah teh baris leungit. Ngabandungan kamekaran jaman basa-basa daerah hususna basa Sunda titinggal karuhun, asa beuki ngurangan pamakena. Abah sok nitenan nu kaalaman kiwari loba diantara jalma-jalma geus mopohokeun basa daerahna. Hampura kagok ari nyarita make basa Sunda teh, pokna. Omongan atawa kalimah kitu teh holna ti generasi kadieunakeun. Aya oge sabagian jalma asal ti daerah ngumbara ka kota poho deui kana basa asal tanah kalahiranana. Kateuing enya poho deui, kateuing ngarasa era, kateuing ngarasa gengsi nyarita ku basa daerahna teh. Penomena sarupa kitu teh mindeng kapanggihan, contona asal ti tatar Sunda teu saeutik nu mohokeun basa Sundana, sigana moal pati beda jeung daerah sejena.
Abah sok rarajeunan balanja ka toko gede di tatar Sunda nanyakeun harga barang teh make basa Sunda. Na ari dijawab ku juru laden toko, make basa mamalayuan. Abah mah angger wae nyarita ku basa Sunda sok sanajan eta juru laden nu ngora keneh umurna, ngomongna malayu. Tampolana sok hayang ngageuingkeun ka nu sok make kalimah basa nu teu kaharti ku pantar Abah teh. Heueuh hirup teh di tatar Sunda ngaromong sarta ngimpi ge make basa Sunda nu katelah basa indung ( basa ibu ). Balanja ka toko kelontong katut toko sejenna juru laden nu umurna ngora keneh ngajawabna teh make basa malayu deui wae. Komo nu ieu mah make kekecapan nu kurang merenah. Contona kecap-kecap model kieu : apeh, berapeh, bokap,nyokap, gope, goceng, ceban, cuan jeung sajabana nu teu haharti ku pantar Abah. Eta basa-basa samodel kitu teh nerekab ka barudak leutik. Geus kaprah ngaromong saperti bokap, nyokap, cuan, gope, goceng jeung sajabana. Paralun nyalahkeun ka barudak, da hal kasebut teh bisa jadi pangaruh lingkungan leutik alias kulawarga, lingkungan arulin, lingkungan sejenna.
Komo kiwari jaman digital, barudak sigana geus meh poho kana basa daerahna lantaran kapangaruhan basa-basa gaul dina hape. Omongan barudak loba nu teu kaharti ku jalma kolot, lantaran maranehna basa ngagunakeun basa gaul tea.
Nilik kaayaan sarupa kitu, jalma kolot kudu mibanda tanggung jawab pikeun mere papatah sarta conto ngagunakeun basa daerah (Sunda ). Barudak generasi ngora kudu mikanyaah basa daerahna, disagigireun urang boga basa nasional ( Bahasa Indonesia ) oge boga basa Ibu ( basa Indung ) nu disebut basa daerah.
Runtagna basa bisa ngabalukarkeun runtagna kabudayaan bangsa. Lantaran basa daerah nu aya di nagara urang teh bagian tina kabudayaan bangsa Indonesia. Hurip-hirupna basa gumantung pamakena, Abah mah nu sapopoe ngotok ngowoh di lembur padukuhan tatar Sunda sapopoena make basa Sunda, omat Abah pesen hususna ka generasi ngora pituin tatar Sunda ulah ngarasa era nyarita ku basa daerah ( basa sunda ), komo ngarasa gengsi, lantaran basa teh ciciren bangsa. ( Tutugan Gunung Puteran dina raraga : Mieling Poe Basa Indung Sa Dunya kaping 21 Pebruari 2024 )
