Advertisment
Bagea para mitra, hampura sawatara ieu Abah tilem dina ieu rohangan, muga para mitra ngamaphum.
Lantaran hirup di pilemburan tea, rambeuh ku pagawean utamana ngolah sawah jeung pakebonan. Ma'lum hirup sapopoe ukur ngagulanggaper taneuh alias pakasaban matuh sabage Patani nepikeun kapopohokeun nulis oge. Tampolana mun pareng reureuh gawe diuk candukul handapeun tatangkalan, bari nyawang pamandangan upluk-aplak pasawahan, sok hemeng mikiran pikahareupeun saha nu baris neruskeun pakasaban saperti Abah ngolah sawah, kebon jadi Patani, sedengkeun generasi ngora loba nu nyaba ka kota. Entong jauh-jauh anak, incu, suan, alo kaponakan Abah wae lah contona, lulus ti sakola lanjutan atas teh tara daek nyaba ka sawah jeung ka reuma ngolah taneuh saperti Abah. Nu jadi marga kateuing pedah kanu ledok kateuing kumaha, nu eces mah najan mindeng di gelendeng di papatahan ulah ngarasa gengsi jadi patani, ih......hare-hare wae padahal apan Patani teh gede jasana, lian ti kitu tani teh mangrupa pagawean mulia.
Terus terang wae di lembur kiwari arang langka manggihan lulusan sakola luhur nu daek ngagecruk macul ngagalengan, babad galeng, ngagarok, tandur, ngoyos ngarambet sok sumawona dibuat ngarit pare ngolah tatanen teh. Eta di lembur Abah, teuing ari di lembur sejen mah, jigana teu pati euweuh. Barudak lulusan sekolah menengah sanggeus mareunang ijazah ngaleut nareangan gawe ka kota gede.
Hiji mangsa mah Abah rarajeunan nanya ka barudak ngeunaan cita-cita mun engke geus gede, gasik narembalan antarana bae hayang jadi tentara, polisi, dokter, pengusaha, pagawe kantor jeung sajabana, bating ilad teu manggih budak nu boga cita-cita hayang jadi Patani. Sangkilang maranehna teh lolobaba anak Patani.
Salaku Kolot teu kudu nyalahkeun generasi ngora hususna dipilemburan. Generasi tua ( jalma kolot ) tetep kudu mere conto hade, kudu leuwih rajin jeung soson-soson migawe pagawean sapopoe di sawah di reuma ngolah tatanen. Hal sarupa kieu teh bisa jadi tina pangaruh pajamanan ngaronjatna tehnologi modern. Generasi ngora teu kudu hariwang, tur honcewang, cek Abah mah teu kudu gengsi jadi Patani. Pangaruh modernisasi bisa disaluyukeun jeung ajen inajen kahirupan sapopoe nu raket pakaitna jeung dunya tatanen. Mun bisa mah kahareupna di sakola-sakola ajarkeun deui cara tatanen saperti keur jaman Abah budak. Baheula waktu sakola dasar diajarkeun kagiatan molah sawah barudak dilatih macul, ngored, ngoyos ngarambet waktuna saban poe saptu, harita disebut hari Krida. Penomena sarupa kieu teh bisa jadi lantaran Kurikulum sakola anu henteu nyoko kana kahirupan lingkungan tatanen.
Mahabuna alat elektronik digital jaman internet Kiwari, loba mangaruhan kana dunya kahirupan sapopoe kaasup kahirupan generasi ngora.
Paralun nyawad kaditu kadieu ieu mah bane wae kaalaman ku Abah tampolana sok hariwang ayeuna keneh dilembur pareng usum molah hese ngajak macul ngagarap sawah kebon, hese ngajak tandur, ngoyos ngarambet atawa ngarambet di sawah teh. Komo generasi ngora anu sakolana ngalaman di paguron luhur arang langka nu daek ngagecruk macul, tandur, ngoyos ngarambet ngandelkeun wae generasi kolot.
Najan kahirupan sarwa modern sigana ari nu molah sawah ngagecruk macul ngoyos ngarambet mah moal leungit, da di nagara urang mah apan katelahna oge nagara agraris.
Pesen ti Abah ka generasi ngora hayu urang micinta ka lemah cai kucara daek ngolah taneuh di sawah, kebon katut leuweung, sumber kahirupanan sakabehna. Jadi Patani teh pagawean anu hade tur terhormat da apan sumberna kadaharan jolna ti Patani, hayu urang turun ka sawah ka kebon ka reuma ngolah tatanen. ( Paniisan wanci Janari )
