Mieling Tepung Taun Kamerdikaan Wujud Micinta Ka Lemah Cai

Advertisment

Ku : Abah Andy Gumilang, S.Pd

Rupa-rupa kagiatan diayakeun dina raraga mieling tepung taun kamerdikaan. Jaman Abah keur budak di lingkungan RT najan teu dibentuk panitia, teu mulut dana atawa waragad. Memeres lembur, ngahias majang lingkungan teh ku swadaya gotong royong tur waragad saaya-aya. Pantes kituna mah tuda jaman tea masih hara-garaeun katurug-turug encan Aya listrik ka pilemburan mah. Masih keneh langka bahan-bahan kertas plastik hiasan model ayeuna. Pikeun ngahias lembur teh cukup ngagunakeun sabangsaning tutuwuhan. Mimiti nyieun pager pipir jalan, nyieun gapura lembur, ngalabur pager, ngahias pos ronda jeung lingkungan sejenna cukup ku awi tali jeung awi surat, ngagunakeun daun brih-brih, daun ki kandel, pucuk daun kalapa, daun kawung, kekembangan katut tutuwuhan sejenna. Ngalabur tembok, pager ku oker atawa kalkarim. Sanajan ukur di rumyang-rumyang ku sarupaping dangdaunan jeung kekembangan ge katembong endah lembur teh.

Warga lembur teu kaleked aub migawena saperti ngala tangkal jambe jang rebutan, ngala awi tamiang jang tihang bandera, nyieun pager tina awi, ngored jalan trotoar nu bala ku jukut, kolot katut barudak ngora migawe pagawean saluyu tugas ti Rurah alias Kapala Dusun. Contona bagean nyieun pager, bagean ngahias lembur kitu teh lain ukur lalaki, tapi rumaja putri, ema-ema ge marantuan gawe. contona nareangan kekembangan, jang rumyang rumyang majang, ema-ema nyadiakeun wedang opieun, sabagian deui jalma kolot dibantuan ku pamuda masang bandera merah putih, kabeh digawe kalayan sumanget tanpa pamrih. Wedang saperti buras, pupuntir, kalentong, beca, peuyeum cau, kulub sampeu, kulub hui, kulub taleus, goreng gadung teu sirikna patulayah pada ngirim. Pagawean nepi ka rengse memeh bedug Asar. Atuh nu temen wekel sok di bere dahar dengeuna pais oncom, angeun poloy (lompong), angeun humut, sambel tarasi, lauk asin mani edit. Sumangetna warga lembur ti beh dituna kawilang hade, teu karana di titah teu karana di ondang sok sawona diburuhan. Samiuk Sabilulungan gotong royong migawe pagawean sakamampuhna.

Panceg poean 17 Agustus minangka puncak acara, warga ngarumpul di alun-alun atawa di lapang daratang ti suklakna ti siklukna parahi hayang milu upacara. Tukang dagang ngampar samak, dagang gado-gado, dagang gemet, comro, misro, es bongbon,

cendol, goyobod, dagang cocooan barudak saperti engek- engekan, kokoleceran, susumpitan, boneka jeung sajabana.

Bubar upacara warga ngayakeun hiburan rahayat murah meriah antarana bae rebutan (panjat pinang), tarik tambang, balap karung, ngasupkeun benang kana jarum bari leumpang jeung sabana. Lebah acara rebutan tangkal jambe beunang nyisit di balur ku pangleuleueur puncerna digantungan barang sarwa weuteuh, kayaning dudukuy cetok, kaos, baju, anduk, ember, panci jeung sajabana matak ngondang kapanasaran hadirin. Mun nepi ka puncer bisa milih hiji barang dibawa ka handap.

Tarik tambang teu eleh geleng, lebah pamilonna ema-ema nu lalintuh, mani rame salusurakan.

Tadisi nu geus maneuh dina raraga mieling tepung taun kamerdikaan ti jaman Abah budak nepi ka kiwari tangtu loba ningkatna. Waktu jaman Abah budak najan sarwa walurat ge, teu eleh ramena. Komo kiwari sagala sarwa nyampak bahan hiasan saperti keretas, plastik, lampu hias jeung percetakan dapon aya danana kari meuli. Kagiatan mieling kamerdikaan nagara urang, boh di kampung boh di kota rame ti baheulana.
Ieu teh marupa wujud micinta ka lemah cai, rasa nasionalisme nu geus nanjeb ti beh dituna omat ulah luntur ku waktu, laas ku jaman, ulah nepi ka ngiles ilang tanpa Karana. Sumanget juang para pahlawan bangsa nu tanpa pamrih, rela berkorban, perelu di pake conto ku urang sarerea. Sakabeh komponen bangsa kudu bisa mertahankeun kamerdekaan Nagara Kesatuan Republik Indonesia (NKRI). Wilujeng Milangkala ka 79 Republik Indonesia. Cag Ah .!! (Perum Cigintung 182024)