Leuwih Hade Nyegah Tibatan Ngubaran

Advertisment

 

Ku : Abah Andy Gumilang, S.Pd

Panyakit nu kawilang bahaya di nagara urang nurutkeun ahli kesehatan aya nu di sebut panyakit ATM singgetan tina Aid,Tubercolosis jeung Malaria. Matak kukurayeun mun geus ngadenge tilu panyakit kasebut. Eta komo nu di sebut Aid/HIV kuayana pergaulan bebas loba jalma nu karerap panyakit kasebut, bisa tepa tatalepa. Nya Kitu keneh kasawat Tubercolose ( TB Paru ) aya oge nu yebut panyakit TBC ieu oge bisa tepa tatalepa nerap ka sagala umur. Nu katilu Malaria, panyangka Abah mah nu awam, ieu panyakit teh geus euweuh, sihoreng nurutkeun ahli kasehatan panyakit nu nyebar liwat reungit awalna panas tiris teh aya keneh. Nu di tularkeun ku reungit teh aya oge nu katelah demam berdarah ieu oge kaitung bahaya bisa tatalepa kanu lian.

Tampolana sok aya nu nyarita polos, heueuh nya ..!!! loba dokter, loba panyakit....omongan Kitu teh geus jadi kacapangan jalma-jalma.

Tapi cek Abah mah lain kitu, urang teu weruh sabenerna mah kana panyakit nu kararitu teh, padahal mah geus aya ti beh dituna, ngan urang teu apal. Contona panyakit eungap, beuteung beukah alias busung, kasudang, panas tiris, panyakit koneng, nongtot bool, peujit koreseun, sakalor, kalingsir jeung rea-rea deui istilah kasawat jaman beh ditu.

Ayana panyakit naon wae kaasup ATM urang mibanda kawajiban pikeun nyegah supaya ulah katerap. Urang kudu ngaronjatkeun perilaku hirup bersih sehat, rajin olah raga, singkahan pergaulan bebas. Urang sakabeh lobaan kagiatan anu positif, pon Kitu deui pihak pamarentah ulah bosen-bosen mere sosialisasi ngeunaan macem-macem panyakit utamana kasawat ATM tea. Leuwih hade nyegah tibatan ngubaran sanggeus katerap kasawat. Cag ah...mudah- mudah sadayana cageur beuteung waras badan, rahayu walagri sehat salalawasna. (Kuningan mangsa hujan ngarurincik 2025 )